Dechreuwch eich stori Caerdydd chi

Gyda’n gilydd, gallwn ni

fynd i’r afael â thlodi a newyn byd-eang

“Nid breuddwydio’n unig yw’r dasg. Mae’n rhaid ichi freuddwydio a cherdded tuag at eich breuddwyd. Drwy gwrdd â phobl o wledydd gwahanol o bedwar ban y byd, rwy’n dysgu am ddiwylliannau newydd ac mae pobl yn dysgu oddi wrtho i. Ac o’m rhan innau, ac fel un rwy’n siŵr, pan fyddwn ni’n ymuno a dod at ein gilydd, gallwn gyflawni byd heb newyn. Dyma’r hyn rwy’n credu ynddo, a dyma sy’n fy sbarduno.”

Tidiane Bangoura (MA)

Cysylltiadau Cyhoeddus Rhyngwladol

Mae taith Tidiane o’i fan geni yng Ngweriniaeth Gini yng Ngorllewin Affrica i Gaerdydd yn adlewyrchu ymrwymiad dwfn i wneud gwahaniaeth ar raddfa fyd-eang. Daeth yma i ehangu ei wybodaeth a’i sgiliau cyfathrebu, gan ddewis cwrs gradd Meistr mewn Cysylltiadau Cyhoeddus Rhyngwladol i wneud hynny.

Mae’n gobeithio codi lleisiau’r rhai sydd mewn angen, gan ddefnyddio ei addysg i gryfhau ei waith ym maes cyfathrebu dyngarol. Ym maes Tidiane, mae mor bwysig gallu cysylltu â phobl o bob cwr o’r byd — ac yng Nghaerdydd mae wedi cael llwyfan gwych i gwrdd â phobl o gefndiroedd amrywiol, i ddysgu ganddyn nhw, ac i rannu ei brofiadau.

Mae dywediad yn ei famwlad: ‘Ni all bag gwag sefyll ar ei ben ei hun.’ I Tidiane, mae hyn yn golygu nad oes modd creu newid ystyrlon heb sylwedd a heb wybodaeth.

Mae Tidiane yn edrych ymlaen at ddechrau ei waith eto gyda Rhaglen Bwyd y Byd, lle bydd yn dod â dealltwriaeth a sgiliau newydd yn ôl i helpu i fynd i’r afael ag ansicrwydd bwyd. Mae’n credu bod modd dod â newyn i ben, gydag ymdrech ar y cyd – ac rydyn ni’n cytuno â hynny.

Archwiliwch ein cyrsiau Cysylltiadau Cyhoeddus