Beth sy’n gyrru eich angerdd am addysg feddygol?

Fel Uwch Ddarlithydd, fy angerdd yw siapio’r genhedlaeth nesaf o weithwyr meddygol. Dw i’n angerddol am eu helpu nhw i ddatblygu, nid yn unig fel clinigwyr, ond fel pobl sy’n deall sut i feddwl yn feirniadol, cydymdeimlo’n ddwfn ac ymgysylltu’n ystyrlon â’r byd o’u cwmpas. Mae meddygaeth yn ymwneud cymaint â chysylltiad dynol ag y mae â gwyddoniaeth, a dw i’n gobeithio helpu i siapio ein myfyrwyr yn ymarferwyr meddygol sy’n deall sut mae braint ac anfantais yn effeithio ar iechyd a lles. Bydd hyn yn cael effaith sylweddol wrth fynd i’r afael ag anghydraddoldebau iechyd, ac anghydraddoldebau ar raddfa ehangach. Yn fwy eang, mae bod yn addysgwr yn fy helpu i fyfyrio’n fwy dwfn, a dod yn berson gwell.

Beth yw eich barn ar werth gweithio ar y cyd ym maes addysg feddygol?

Dyna’r unig ffordd. Rydyn ni i gyd yn gweld y byd o’n lens croestoriadol ni, boed hynny’n hil, rhywedd neu gyfeiriadedd rhywiol. Drwy weithio ar y cyd, gallwn ni sicrhau ein bod ni’n gwneud y penderfyniadau gorau, a’r rhai mwyaf cynhwysol, ac yn modelu’r ymddygiadau rydyn ni’n eu disgwyl gan ein myfyrwyr — sef meddygon y dyfodol. Yng Nghaerdydd, mae arbenigedd cyfunol, amlddisgyblaethol ac amrywiol ein staff yn helpu myfyrwyr i ddatblygu arferion gweithio cynhwysol, sydd ond yn gallu bod o fudd i gleifion, eu cyfoedion, eu darpar gydweithwyr a’r gymuned ehangach.

Beth yw eich gweledigaeth ar gyfer dyfodol addysg feddygol?

Dw i’n rhagweld dyfodol lle mae addysg feddygol yn fwy integredig, cynhwysol ac ymatebol i anghenion cymdeithas. Mae angen i ni geisio cofleidio technolegau uwch fel realiti rhithwir (VR) a deallusrwydd artiffisial (AI) a theclynnau efelychu i greu profiadau trochol. Mae hyn yn galluogi myfyrwyr i ymarfer sgiliau a gweithdrefnau clinigol mewn amgylcheddau di-risg, gan roi cyfleoedd i feistroli technegau cyn profi senarios bywyd go iawn.

Y tu hwnt i ddatblygu ein dealltwriaeth o feddygaeth, mae angen i ni sicrhau bod ein myfyrwyr yn barod i ymdrin ag agweddau cymdeithasol maes iechyd. Dw i’n credu drwy gofleidio amrywiaeth a’i hintegreiddio ym mhob agwedd ar ein cwricwlwm, gallwn hyfforddi meddygon sydd nid yn unig yn iachawyr ond sydd hefyd yn eiriolwyr dros gyfiawnder a thegwch mewn gofal iechyd.

Beth ydych chi’n credu ‘Gyda’n gilydd, gallwn…’?

Gyda’n gilydd, gallwn drawsnewid addysg feddygol i wasanaethu anghenion ein cymdeithas amrywiol yn well. Drwy weithio ar y cyd, gallwn greu amgylchedd dysgu cynhwysol lle mae pob myfyriwr yn ffynnu, yn datblygu’r sgiliau angenrheidiol i ddod yn ddarparwyr gofal iechyd tosturiol a chymwys, a meithrin dealltwriaeth ddyfnach o ofal cleifion a moeseg feddygol.